Friday 31 August 2018

ഫിലിം ക്രിട്ടിക്സ് മണ്ണാറക്കയം അവാര്‍ഡ് പ്രഖ്യാപിച്ചു


തിരുവനന്തപുരം- മികച്ച ചലച്ചിത്രഗ്രന്ഥത്തിനും ലേഖനത്തിനുമുള്ള 2016, 2017 വര്‍ഷത്തെ കേരള ഫിലിം ക്രിട്ടിക്സ് അസോസിയേഷന്റെ മണ്ണാറക്കയം ബേബി അവാര്‍ഡ് പ്രഖ്യാപിച്ചു. എം.ഡി.മനോജിന്റെ സിനിമയിലെ സംഗീതയാത്രകള്‍ 2016 ലെ മികച്ച ഗ്രന്ഥത്തിനുള്ള അവാര്‍ഡ് നേടി. ഡോ.അരവിന്ദന്‍ വല്ലച്ചിറ രചിച്ച 125 വിശ്വോത്തര ചലച്ചിത്രങ്ങള്‍ക്കാണ് 2017ലെ മികച്ച ഗ്രന്ഥത്തിനുള്ള അവാര്‍ഡ്.
രാകേഷ് ആര്‍.നാഥ് എഴുതിയ അരവിന്ദന്‍-കലയും ദര്‍ശനവും 2016ലെ ഗ്രന്ഥത്തിനുള്ള പ്രത്യേക ജൂറി അവാര്‍ഡും നേടി. രാകേഷ് ആര്‍ നാഥിന്റെ തന്നെ ഇരകളുടെ പ്രത്യയശാസ്ത്രത്തിനാണ് 2016ലെ മികച്ച ലേഖനത്തിനുള്ള അവാര്‍ഡും.
ബ്ളെയ്സ് ജോണിയുടെ ചുവന്ന സിനിമയിലെ ഭൂതവര്‍ത്തമാനങ്ങളാണ് 2017ലെ മികച്ച ലേഖനം.പ്രേംചന്ദിന്റെ നൂറ്റാണ്ടിന്റെ മൗനങ്ങള്‍ക്ക് പ്രത്യേക ജൂറി അവാര്‍ഡ് നല്‍കും.
പ്രൊഫ. ജോര്‍ജ്ജ് ഓണക്കൂര്‍, തേക്കിന്‍കാട് ജോസഫ്, പ്രൊഫ.ജോസഫ് മാത്യു പാലാ എന്നിവരടങ്ങുന്ന ജൂറിയാണ് മികച്ച ചലച്ചിത്രഗ്രന്ഥം തെരഞ്ഞെടുത്തത്. പ്രൊഫ.വിശ്വമംഗലം സുന്ദരേശന്‍, അഡ്വ. പൂവപ്പള്ളി രാമചന്ദ്രന്‍ നായര്‍, എ.ചന്ദ്രശേഖര്‍ എന്നിവരാണ് ലേഖനജൂറിയംഗങ്ങള്‍.
Sir text for approval regards chandrasekhar